Mga kawani sa Talisay City Hall nagsaulog sa piyesta ni Santo Niño
CEBU, Philippines — Bisan pa sa hulga sa COVID-19 ang mga kawani sa Talisay City Hall nagpahigayon kini og piyesta kang Senior Santo Niño kagahapon.
Ang Talisay City Hall magsaulog kini sa kapistahan ni Senior Santo Niño nga ilahang patron sa unang adlaw nga Biyernes sa buwan sa Pebrero matag tuig. Karong tuiga simple lang ang ilang pagsaulog sa piyesta.
Ang mga kawani nidalit lang kini og buwak ingon man pangadye kang Santo Niño diin ilang giampo nga matapos na kining giatubang nga pandemiya nga problema sa tibuok kalibutan.
Bisan og nagsaulog sa pista padayon gihapong nidawat og mga kliyente ang nagkalain-laing buhatan sa city hall.
Ang imahen ni Santo Niño gidala diha sa Santo Niño Parish sa Barangay Mohon diin gipahigayon ang Santos nga Misa.
Ang kapistahan diha sa Talisay City Hall mao usab ang pagsugod sa nobenaryo alang sa kapistahan sa maong simbahan sa sunod semana. —BDB (BANATNEWS)
- Latest
