Cebu, Philippines — Hinay-hinay na og kisaw ang politika sa unang distrito karong panahona.
Una niini nanggawas nga estoryang si Mayor Gerald Anthony “Samsam” Gullas sa Syudad sa Talisay nisibaw nga mobalik sa pagka kongresista.
Apan ang naulahi nitubag nga dili pa angay hisgutan ang politika karong panahona.
Ang kasaligang tinubdan niingon nga biyaan ni Gullas ang Talisay ngadto ni Bise Mayor Alan Bucao.
Nitumaw sab ang pangalan ni kanhi mayor Valdemar Chiong sa Syudad sa Naga nga interesado sa kongreso.
Ang tinubdan sa impormasyon nakaingon nga dili lisod ni Chiong ang maong posisyon tungod sa iyang relasyon sa mga mayor sa unang distrito.
Gawas pa niana, pambato ni Chiong ang kalambuan karon sa Naga nga posibleng iyang dad-on sa iyang pagka kongresista.
Ang kasinatian ni Chiong dili sab kabintahaan sa mga kasamtangang naa sa posisyon.
Apan si Chiong sa iyang bahin nagkanayon nga nalingaw ra siya sa iyang kinabuhi nga pribado karon. (BANAT NEWS)