CEBU, Philippines — Nagpagawas og Memorandum No. 2020-4 si Cebu City Mayor Edgardo Labella alang sa tanang Barangay Kapitan sa dakbayan nga nagtugot kanila nga magbutang og live streaming sa novena masses sa ilang mga Barangay Sports Center o complex.
Karong adlaw’ng Biyernes, Enero 8 magsugod ang unang adlaw sa novena mass nga kabahin sa kalihukan sa simbahan sa kapistahan sa balaang bata Sr. Sto. Niño. Gimanduan usab sa mayor ang kapolisan nga magbutang og police personnel aron masiguro nga masunod ang Basic Health Protocols.
Lakip sa gitugot nga magamit nga venue sa live streaming sa misa mao ang senior citizens park, Plaza Independencia ug Fuente Osmeña oval diin magbutang og dagkong screen aron anha nalang ang mga tawo nga motambong sa novena mass.
Si Konsehal Dave Tumulak sa iyang bahin miingon nga inig sulod sa mga manimbahay sa Basilica moadto una sa washing area, duna sab sila’y public information booth aron makagiya sa mga manimbahay.
Nagkasabot sab ang siyudad ug ang usa ka mall diha sa South Road Properties nga ang tanang private vehicles mahimong maka-park nga libre sa maong mall ug duna lay bus nga mokuha nila ug mohatud sa Malacañang sa Sugbo ug human sa misa ihatod usab sila pabalik sa mall.
Samtang gipahibawo usab ni Cebu City Police Office Director Police Col. Josefino Ligan nga 500 ka mga securirty personnel ang ipakatap atol sa pagsugod sa misa novena.
Matud pa ni Ligan, adunay task force nga mga police nga gikan sa Cebu Bohol ug Siquijor ang mobantay lakip usab ang mga force mutlipliers. —Rowena D. Capistrano/MEL (BANATNEWS)