Cebu, Philippines — Nipahigayon og inspection ang mga sakop sa Division for the Welfare of the Urban Poor (DWUP) Cebu City sa nagpadayon nga pagtrabaho sa dalan diha sa Barangay Hipodromo, ning dakbayan.
Kahinumduman nga nimando si Cebu City Mayor Edgardo Labella sa pagbalik sa dalan human nasunog ang mga balay sa maong Barangay.
Niadtong buwan sa Oktubre ang Cebu City Government misugod sa pagpahigayon og clearing operation sa mga istraktura nga nakababag sa karsada.
Ang gihimong clearing operation dunay mga lugar nga ablihan alang sa karsada ilabi na sa mga sudlonon nga bahin aron dali nga malutsan panahon sa emerhensya.
Ang inspeksiyon nga gihimo sa Nalcaba old road sa nahisgutang barangay gipangulohan ni Roy Miñoza, Section Head sa Land Inspection Section sa DWUP.
Malipayon si Miñoza sa dihang iyang nakita nga dako na og agi ang padayon nga gitrabahong kapin sa dosentos ka metros nga dalan sulod sa Baranggay Hipodromo.
( BANAT NEWS)