Pabrika sa MEPZ nanaktak og 300 ka mga empleyado

CEBU, Philippines — Usa ka pabrika sa mga himoanan og sinina sa Mactan Economic Processing Zone nanaktak og 300 ka mga kawani nga nakapasurpresa sa mga naapil.

Tungod niini, niprotesta ang mga apektadong empleyado diha sa ganghaan sa First Glory Apparel ug nagmartsa palibot sa Ecozone complex.

“First Glory management is a Grinch for firing workers weeks before Christmas. Ito ba ng pamaskong handog nila sa mga manggagawang tapat na nagsilbi sa kompanya?,” matud ni Cristito Pangan, ang lider ug usa sa mga nataktak.

Matud ni Pangan nakurat sila pagpatawag kanila sa meeting uban sa tagdumala sa miaging adlaw ug giingnan sila nga mao na kadto ang kataposang adlaw sa ilang pagtrabaho.

“Nasurpresa na lang mi nga sa among meeting gi ingnan mi nga retrenched na mi effective immediately,” matud pang Pangan.

Sumala pa niya gitanyagan sila og usa ka buwan nga sweldo ug 15 ka adlaw nga sweldo kada tuig sa ilang pagpanarbaho sa kompanya isip pabawon.

“Wala mi nisugot sa ilang offer. Kay matud pa sa management, company losses due to the pandemic ang ilang rason. Pero  dili mi motuo nga alkansi ang company kay daghan man ni og mga order sa gawas sa nasud,” matud ni Pangan.

Ang kompanya nag-export og mga t-shirts didto sa Hongkong, Amerika ug ubang mga nasud.

Nagdumili pagdawat ang mga empleyado sa tanyag kay mas gusto nila nga mabalik sila sa trabaho.

Nagtuo si Pangan nga gigamit lang sa kompanya ang pandemiya sa Covid-19 ug pagbangkarota aron ilisan silang mga regular nga kawani og contractual employees.

Si Dennis Derige, tigpamaba sa Partido Manggagawa-Cebu wa mokubos ang produksyon sa maong kompanya ug pagpamatuod niini mao ang pagpatrabaho sa mga empleyado bisan holidays ug adlaw nga Domingo.

Sa sayo pa, ang Sports City group of companies nanaktak sab og 4,000 ka kawani, sunod ang Yuenthai nga nanaktak sab og 200 ka kawani ug 100 ka kawani sab sa FCO. Kini pulos mga garments factory nga nagbase sud sa MEPZ.— The Freeman/IBM