CEBU, Philippines — Hingpit na nga giturn-over sa Department of Public Works and Highways(DPWH) ang ilang proyekto nga makatabang sa mga health workers ingon man sa mga COVID-19 patients. Ang DPWH nitagana og initial funding nga P294 million alang sa constructions sa COVID-19 healthcare facilities sa nagkadaiyang bahin sa Metro Cebu.
Nakompleto sa DPWH ang 13 dormitories alang sa medical workers, pito ka isolation facilities alang sa mga pasyente nga dunay mild COVID-19 symptoms ug tulo ka laing converted isolation facilities. Usa ang Cebu City sa nakabenipisyo sa maong mga health care facilities diin gipahigayon kagahapon sa buntag ang turn-over ceremony nga gitambungan sa mga opisyales sa DPWH, DILG-7 ug Cebu City Government.
Diha sa compound sa Cebu City Quarantine Center (CCQC) gitukod ang off-site dormitories alang sa mga health workers ug isolation center alang sa mga COVID-19 patients.
Unom ka units sa dormitories ang gitukod, ang kada unit dunay 16 ka kwarto hinungdan nga moabot sa dul-an sa usa ka gatos ka mga health workers ang makapahimulos niini.
Si Cebu City Medical Center(CCMC) Administrator Yvonne Cania mipakita kun unsay hitsura sa dormitories, ang kada kwarto dunay kaugalingong comfort room, air conditioned ug bisan og double deck ang kama apan usa ra ka tawo ang makasulod kini subay na sab sa kagustuhan sa DPWH.
Gitataw ni Cania ang priority nila sa maong dormitories ang nurses ug doctor sa CCMC ingon man sa CCQC hinoon kun dunay sobra modawat sila og health workers gikan sa pribadong tambalanan.
“Kay wala naman before naa mi D’Inn, naa mi Travel Bee, naa mi Bradford unya karon nihangyo lang gyud mi sa Robinson’s Galleria up to 28 ra sad mi, so after ana ari na ang mga nurses ug doctors nato”, sigon ni Cania.
Si Mayor Edgardo Labella nagpasalamat sa tabang sa DPWH ug miingon nga ang maong proyekto nagpakita sa lig-ong koordinasyon ug kooperasyon sa national government ug local government units. /MEL (BANATNEWS)