Mga developer sa subdivision sa Tisa ipatawag

CEBU, Philippines — Gibutyag  sa hepe  sa  Cebu City Disaster Risk Reduction Management Office  Ramil Ayuman nga posibleng ipatawag niya ang mga developer sa pipila ka subdivision sa Barangay Tisa aron sutaon ang  estado sa drainage system niini.

Sa pakighinabi ni Ayuman sa Banat News nagkanayon kini nga importante kaayo ang maong tigom aron mahatagan og katin-awan ang kanunay nga paglunop diha sa Sitio Tambisan ug sa mga silingan nga sitio niini sa Barangay Tisa sa higayon nga mobunok ang kusog nga ulan.

Matud ni Ayuman nga mohimo usab siya og lapad nga koordinasyon sa opisyales sa maong dapit.

Giingong taod-taod na ang maong problema ug kanunay nga bation og kabalaka ang mga residente sa maong sitio sa higayon nga mobunok ang ulan.

Nasayran nga sa niaging semana namakwit diha sa barangay hall sa Tisa ang pipila ka mga residente sa nahisgutang sitio gumikan sa dakong baha nga resulta sa upat ka adlaw nga pag-ulan.

Sayo pa, si Mayor Edgar Labella nimando sa dinaliang pagsusi diha sa nagkadaiyang barangay nga kanunayng nagproblema sa higayon nga mobunok ang ulan.

Gikataho nga unom ka barangay ang nakasinati og pagdahili sa yuta sa niaging semana hinuon walay naangol sa maong mga insidente. /BDB (BANATNEWS)