Operasyon sa minahan hagbay rang nahibaw-an, apan…

CEBU, Philippines — Hagbay ra nga nasayod ang munisipyo sa Alcoy nga mobaligya og dolomite ngadto sa lokal nga merkado ang  mining firms nga nahimutang sa lungsod.

Matud ni Mayor Michael Angelo Sestoso nga sa iyang nasayran mga 20 ka tuig nga namaligya og minerales ang Dolomite Mining Corporation ug Philippine Mining Service Corporation (PMSC) ngadto sa local nga merkado.

Apan matud ni Sestoso, nagdahom siyang apil na kini sa negosyo ug Mineral Production Sharing Agreement (MPSA) tali sa maong kompaniya ug sa gobiyerno.

“Nagtoo lang pud mi apil na na sila kay dugay naman na sila namaligya ana, nagtoo man mi diri sa Alcoy nga apil na sila pareho sa local ug international. Wala man ta kahibalo nga naa may ordinansa ang province ana,” matud ni Sestoso.

Si Gobernador Gwendolyn Garcia niluwat og cease and desist order batok sa DMC ug PMSC aron mapugngan ang dugang pagkubkob, pagproseso ug pagbaligya sa dolomite padulong sa Manila Bay human nasayran usab sa gobernador nga walay permit nga gikuha ang maong mga kompaniya alang sa waste deposits niini.

Si Sestoso nagkanayon nga makigtagbo siya sa mga opisyal sa DMC ug PMSC sunod semana.

“Atong hangyon nga siguro nga mopatoo lang ta sa ordinansa sa Probinsya para wala tay problema ug dili mabalda ang inyong pagbaligya sa local,” dugang ni Sestoso.

Gikompirmar sa mayor nga wala silay nadawat sa lungsod gikan sa pagbaligya sa DMC ug PMSC ngdto sa lokal.

Si Garcia una ng nagkanayon nga kinahanglang motingog ang Alcoy kalabot niini hilabina nga anaa nahimutang ang maong mga kompaniya sa lungsod.  Matod ni Garcia nga dili siya ganahan nga adunay laing “Naga landslide” nga mahitabo.

Si Sestoso nagkanayon nga mas maayo nga mosunod sa ordinansa sa Probinsya  ang maong kompaniya aron dli lang ang DENR ang maka-monitor sa ilang operasyon kay apil na usab ang Kapitolyo. /IBM (BANATNEWS)