Online booking sa voters registration gi-awhag sa Comelec

CEBU, Philippines — Sa unang adlaw sa pagbalik sa voter's registration kagahapon, daghan gihapon ang niadto sa mga buhatan sa  Comelec  ug wala moagi sa bag-ong gipatuman karon nga mo-book  online ang gustong magpa-rehistro.

Matod ni Atty Lionel Marco Castillano ang Provincial Election Supervisor nga kasagaran sa nag-parehistro walk-ins hinungdan nga ang uban gihatagan na lang usa og porma sa Comelec ug pabalikon sa mosunod na nga adlaw hilabina ang naa sa syudad.

"Although we campaign for online bookings daghan gihapon ang walk-ins" matod ni Castillano.

Didto sa syudad sa Lapu-Lapu matod ni Castillano nga wala usa modawat og walk-in ang Comelec didto sa maong dakbayan tungod kay gamay ra ang ilang buhatan.

"Delikado man gud ang lugar sa Comelec didto sa Lapu-Lapu unya naa pa gyud sulod sa City hall, magtapok sila diha sa corridors. So nikuan ang election officer nga dapat tanan online appointments" matod ni Castillano.

Niawhag si Castillano sa mga gusto magparehistro nga mas maayo nga mag book usa og online una pa moadto sa local comelec offices.

"Nakita namo ang advantage nga kun online appointment, naka-download na ka daan og porma,ma fill-upan,not more than 15 minutes mahuman ka. Mas dali ang panahon nga mo stay sila sa among opisina mas lesser ang exposure" matod ni Castillano.

Ang mga gusto magparehistro, pa-reactivate sa registration, transfer o correction sa entries mamahimong magpabook online pinaagi sa mga facebook page nga gigama sa Local comelec office sa LGUs ug maka-download sa porma. Ang Comelec bukas kini matag Martes hangtod Sabado gikan sa alas 8 sa buntag hangtod alas 3 sa hapon.

Samtang gitug-an usab ni Omar Sharif Dilangalen Mamalinta, Election Assistant II nga hugot nila nga gipatuman ang minimum health protocols sa pagpahigayon sa voters registration.

Dugang pa ni Mamalinta nga nanawagan sila nga mokooperar ang katawhan sa online transaction aron dali na lang ang pag encode sa data sa mga mopa rehistro ug dyutay ra ang mga tawo nga moadto sa buhatan sa comelec aron paglikay sa COVID-19.

Si Mamalinta, nitug-an atol sa unang adlaw sa voters registration adunay 8 ka bag-o nga nagparehistro ug 3 ang nagpa correct sa ilang entries sa 1st district o north district. —Rowena D. Capistrano/MEL (BANATNEWS)