300 balay gibahaan bisan way uwan

CEBU, Philippines — Tado sa baha sa duha ka Sitio sa Barangay Umapad Mandaue City adlaw nga Sabado bisan og wala mag-ulan niadtong adlawa sa siyudad.

Matud pa sa mga residente niabot lapas sa tawo ang giladmon sa tubig nga nidagayday sa ilang mga balay ug kinahanglan pa i-rescue ang pipila ka mga residente.

Walay ulan sa Mandaue City adlaw nga Sabado apan nagbunok ang uwan sa kabukiran ug ang baha midagayday sa ubos padung sa maong barangay ilabi na ang lupa kaayong mga sitio nga Sitio Pentax ug Sitio Laray.

Walay naangol o nakalas sa hitabo, apan nakaguba kini sa mga kagamitan sa mga panimalay ilabi na ang mga appliances ug mga dokumento.

Ang mga tawo kasamtangan nga gipabkwit sila sa Umapad Elementary School pagkagabii sa Sabado ug gihatagan na og food packs sa City Social Welfare Service ug uban pa nilang panginahanglan.

Kagahapon sa buntag, Domingo, nakabalik na ang mga residente ug nanglimpyo sa ilang mga balay.

Si Dina Lou Jamero ang Social Worker/Section Head nibutyag nga adunay 335 o 1,345 ka tawo nga naapektahan sa maong baha. — /IBM (BANAT NEWS)