Politika sa Talisay nibukal na?

CEBU, Philippines — Bisan anaa pa sa tungatunga sa pandemiya ang nasud, namatikdan na ang hinayhinay nga pagbukal sa kawa sa politika nunot sa umaabot nga piniliay karong tuig 2022, nabantayan kini karon sa lokal nga mga opisyales.

Sa Siksto Distrito duna nay nagpadungog-dungog og interes sa pagdagan karong umaabot nga piniliay.

Apan sa Siyudad sa Talisay nitumaw sab ang hungihong nga silang Mayor Gerald Anthony “Samsam” Gullas Jr. ug si Bise Mayor Alan Bucao posibleng maoy magbangga sa sunod nga piniliay.

Nitumaw ang estorya human nisibaw ang usa ka Facebook account nga Tingog sa Talisaynon ang posibleng mahitabo sa piniliay sa 2022. Naukay ang kampo sa Alayon ingon man ang Talisaynon niini.

Hinungdan nga wala kini palabya ni Gullas iya kining gituldokan ang estorya nga nitumaw. Matud pa sa mayor nga pagguba sa ilang maayo nga relasyon ni Bucao maoy ang tumong sa estorya nga nikatap.

“Dili unta ko motagad ani, pero sa ngalan nga ilang giyatakan among friendship with VM Alan, motubag gyud ko para lang to assure everyone that there is no rift between us, even on day one up until today,” nagkanayon si Gullas sa iyang kapartido.

Asoy pa niya nga padayon ang iyang komunikasyon ni Bucao nga matrabaho man o personal ang hisgutan.

Apan ang kasaligang tinubdan nag-ingon nga nagtapok-tapok na og sugod og mga tawo ang kampo sa bise mayor.

Si Bucao  namahayag sa iyang Facebook page nga naghangyo nga dili samokon ang ilang maayong relasyon sa mayor.

“Magpadayon ang among sinsero og kinasingkasing nga pagpangalagad sa mga Talisaynon. Wala kami maghunahuna og politika, serbisyo sa dakbayan ang among gihuna-huna labi na sa panahon karon,” sigon pa ni Bucao. /IBM (BANATNEWS)