Mga nagpuyo daplin sapa diha sa Managuksok ibalhin
CEBU, Philippines — Giaprobahan sa konseho sa Dakbayan sa Sugbo atol sa ilang regular session niadtong Miyerkules ang giduso nga resolusyon ni Konsehal Jerry Guardo, chairman sa committee on infrastructure.
Matud ni Guardo nga ang mao niyang resolusyon nagrekomendar kini sa pagbalik sa 3-meter easement diha sa Sitio Managuksok, Barangay Bonbon, Dakbayan sa Sugbo.
Sa nilabay nga mga semana si Guardo nibisita kini diha sa Sitio Managuksok human sa nahitabong insidente sa lugar diin tulo ka balay diha duol sa sapa ang gibanlas sa baha dihang nisaka ang tubig sa sapa.
Nasuta ni Guardo nga wala nasunod ang 3-meter easement diha sa lugar ug delikado ang sitwasyon sa mga nagpuyo niini ilabi na kon mobunok ang kusog nga uwan.
Girekomendar ni Guardo nga i-recover ang 3-meter easement isip “no building zone” tungod kay kasagaran sa mga balay diha sa Sitio Manugsok gipabarog kini diha sa natural ways sa sapa.
Ang mga nagpuyo sa lugar kinahanglang mosibog kini aron malikay sila sa disgrasya.
Si Guardo nagkanayon nga hatagan nila og kopya sa resolusyon ang opisyales sa Barangay Bonbon, Cebu City Disaster Risk Reduction Management Office (CCDRRMO) ug Division for the Welfare of the Urban Poor (DWUP).
Nasayran nga una nang nibutyag si Konsehal Dave Tumulak nga nangita na og paagi ang kagamhanan sa siyudad aron matubag ang problema sa nahisgutang sitio pinaagi sa pagpangita og luna nga mahimong katukoran og balik sa mga balay sa pamilyang maapektohan. /BDB (BANATNEWS)
- Latest
