Pribadong eskwelahan makasugod na sa klase

CEBU, Philippines — Ang mga pribadong eskwelahan pweding makasugod na karong adlawa sa pagbukas sa ilang klase apan nagkinahanglan sila og special permit gikan sa Department of Education sa pag-operate sa school year karong tuiga.

Si DepEd-7 regional director Salustiano Jimenez nibutyag nga nakaisyu na siya og 400 ka permit ngadto sa nagkalainlaing pribadong eskwelahan sa Central Visayas alang sa school year karong tuiga.

Samtang ang mga pampublikong eskwelahan sa rehiyon-7 sa Oktubre 5, 2020 gikatakdang pagbukas sa klase diin kinahanglang mosunod sila sa kamandoan ni DepEd Secretary Leonor Briones.

Gibutyag ni Jimenez nga ang 19 ka school divisions dinhi sa rehiyon nga nagpahigayon na og dry-runs sa pagpangandam  sa pagbukas sa klase alang unta sa Agosto 24, 2020 ug giingong andam na usab unta sila apan nakadawat sila og kamandoan nga sa Oktubre 5, 2020 magbukas sa klase ang mga publikong eskwelahan.

Matud ni Jimenez nga niadtong Agosto 14, 2020 niabot ngadto sa 1.7 milyon ka estudyante ang na-enroll na diin anaa na sila sa 95 porsyento sa ilang target enrollees nga 1,755,000 .

Ug nabantayan nila karon nga 7,000 ka estudyante gikan sa pribadong eskwelahan ang nibalhin sa pampublikong eskwelahan gikan sa  kinder ngadto sa grade 11. Gikan sa The Freeman/BDB