Mga bodega nga gibutangan sa mga explosives ipasusi sa PRO-7
CEBU, Philippines — Gimandoan sa Police Regional Office (PRO7) ang Civil Security Group nga susihon ang mga warehouse nga gihimong explosives storage aron malikayan ang nahitabo nga pag ulbo sa Beirut Lebanon niadtong milabay nga adlaw.
Matud ni PRO7 Director Police Brigadier General Albert Ferro iyang ipasusi sa CSG7 ang maong mga warehouse kung nasunod ba ang safety protocols sa PNP. “Ang akoa lang is the storage of explosives separating the initiator and the explosives because if they’re in one storage, delikado sila.” suma pa ni Ferro.
Dugang pa niya nga makig alayon usab siya sa Philippine Coast Guard alang sa pag subay sa mga gipang transport nga mga ammonium nitrate nga gigamit sa mining operation.
Gipasabot ni Ferro nga kung dili kini mapahimutang sa husto nga butanganan mahimong mo buto kini ug mabutang na hinuon sa peligro ang kinabuhi sa mga tawo nga naa sa palibot.
Lakip sa ipa susi ni Ferro ang ilang explosives storage facility sulod sa kampo sa PRO-7 kung nasubay ba ang PNP safety standard. Gisalikway hinuon niya ang mga pagduda nga binuhatan sa teroristang grupo ang nahitabo sa Lebanon tungod kay wala pay grupo nga miangkon nga sila ang responsabli.
Una nini miawhag ang kongresista sa ikatulong distrito sa lalawigan sa Sugbo Pablo John Garcia sa mga sakop sa Bureau of Customs ug ubang otoridad sa pag susi sa tanang warehouse nga adunay gi tago nga explosibo. /MEL (BANATNEWS)
- Latest
