Dunay drive-thru swabbing center
CEBU, Philippines — Ang Vicente Sotto Memorial Medical Center (VSMMC) milusad sa ilang Drive-Thru and Walk-Thru swabbing station alang sa RT-PCR sa SARS CoV2 (COVID-19) kagahapong adlawa ug gipaabot nga karong adlawa kini magsugod og dawat og magpa test Hulyo 24, 2020.
Ang programa sa Vicente Sotto Memorial Medical Center’s Subnational Laboratory (SNL) nahasubay sa Expanded Testing Guidelines nga nalatid sa DOH Memorandum 2020-0258-A.
“A program to test people, this is for the public and this is for free,” matud ni Atty. Cris Panugaling Spokesperson of Vicente Sotto Memorial Medical Center (VSMMC).
Ang programa bukas para sa tanan ug wala kini limitasyon sa edad. Ang mga buot nga magpa swab test mahimong magparehistro online ug magpa-eskedyul.
Kun marehistro na sa online hatagan kini didto sa petsa kun kanus-a kini mahimong moadto sa VSMMC-SNL.
Mahimong bisitahon ang official Facebook page sa Vicente Sotto Memorial Medical Center aron mahibaw-an kun unsa ang mga kinahanglang buhaton aron marehistro.
Libre ang swabbing ug ang resulta ipadala lang pinaagi sa email sud sa upat ka adlaw. Ang mga lokal nga opisyal (LGUs) diin magpuyo ang nagpa-swab test makakuha sab og kopya sa resulta aron maoy basehan sa DOH-RESU sa contact tracing kun pananglitan magpositibo.
Ang Walk-Thru and Drive-Thru swabbing makaserbisyo lang og 20 ka tawo matag adlaw isip pagtamod sa mga safety measures batok sa pagkatap pa sa Covid-19.
Kinahanglang magdala og usa ka identification card nga giisyu sa gobiyerno ug ang appointment schedule sa tawong magpa-swab test. Magsugod sila pagdawat sa magpa-test alas-9 sa buntag hangtud sa alas-3 sa hapon. Matud ni Atty. Panugaling kadtong mga magpaubos sa swab test dili kinahanglang mosulod sa VSMMC building. Kini ipahimutang sa gawas sa VSMMC sa dalan B. Rodriguez St. Cebu, City.
“In Drive-Thru swabbing, you don’t need to go out of your car, it’s just like when you are going in a drive-thru of a fast food chain,” matud pa niya.
Subli niyang gipahinumdoman ang publiko nga ang Covid-19 dili balewalaon. Hangtud nga adunay magparehistro online magpadayon ang operasyon sa maong programa. The Freeman/IBM
- Latest
