Mga kapitan patabangon og bantay sa mga badlongon

CEBU, Philippines — Giawhag sa Cebu City Police Office (CCPO) ang mga kapitan sa nagkadaiyang barangay sa Dakbayan sa Sugbo sa istrikto nga pagpatuman sa “stay at home” diha sa ilang mga lugar.

Kini human sa nikatap nga hulagway diha sa social media diin nakita nga nanggawas ang mga residente human nilabay ang mga sakop sa Special Action Force (SAF) sa Barangay Tejero ug Barangay T. Padilla.

Matud sa direktor sa CCPO Police Colonel Josefino Ligan nga nakighinabi na niya ang iyang mga station commander lakip na ang mga kapitan sa 80 ka barangay human nakita nga palabyon lang ang mga nagpatrolya unya manggawas sa ilang mga balay ang mga reisdente.

Daghang nisaway nga mga nitizen sa maong post ug nipadayag sa ilang kabalaka tungod kay ang nahisgutang mga residente nanggawas nga wala magsul-ob og facemask.

Gibutyag ni Ligan nga mao usab ang ilang makita atol sa pagpalupad nila og drone pag-monitor sa mga lugar.

Hinungdan nga nanawagan siya  sa mga barangay kapitan nga motabang sa kapolisan sa pagpamadlong sa mga tawo nga dili motuman sa protocols.

Magpadayon ang pakigdialogo sa kapolisan ngadto sa barangay officials kabahin sa mga tawo nga dili motuman sa protocols kinsa manggawas sa ilang mga balay nga walay facemask diin giingon mao kini usa sa mga hinungdan nga nidaghan ang nataptan og virus diha sa kabarangayan.

Giila usab nila ang barangay officials nga namuyo sa matag sitio aron sila na ang mobantay ug mo-report dayon sa kapolisan kong adunay manggawas ug magtapok diha sa ilang dapit. /BDB (BANATNEWS)