Dili na mosilot, kasohan nalang diretso
CEBU, Philippines — Gitawag sa Police Regional Office 7 ang atensyon sa mga sakop sa PNP-Special Action Force (SAF) tungod sa nadawat niyang mga reklamo sa pamaagi nila pagbadlong ug pagpanakop sa mga tawong sa ilang tan-aw nakalapas sa Enhanced Community Quarantine(ECQ) protocols sa Dakbayan sa Sugbo.
Si PRO7 Regional Director Police Brigadier General Albert Ferro miingon nga duna kini nadawat nga reklamo bahin sa giingong pugos nga pagpalakaw sa usa ka 59-anyos nga ginang bisan sa kainit sa adlaw agi silot kaniya.
Ang maong ginang giingong mopalit unta og sud-an ug nagsuot kini sa iyang QR Coded Pass, apan gisita ug gidakop tungod kay giingong walay counter-seal sa barangay ang iyang dalang pass.
Ang maong ginang giingong gisilotan pinaagi sa pagpabaklay kaniya padung sa Basak ug gipabalik diha sa ila sa Brgy. San Nicolas sa “Tagalog-speaking” nga polis.
Si Brgy. Kapitan Clifford Jude Niñal miingon nga ang anak nga babaye sa maong ginang maoy mireklamo kaniya nga gidakop ug gisilotan sa polis nga nagbantay diha sa Carlock Street ang iyang mama. Ang maong ginang na-stroke na kaniadto.
“Dili ‘to pwede, basta any inhuman or not authorized, ako na silang gisultian nga you should do away ‘yung mga physical exercise that’s my directive. You just follow the normal force of apprehension and filing of case, no more na yung ipa push up wala na to, gipalakaw wala na to. We will reprimand all those that have been doing the other form of punishment that is not stated in Republic Act 11332,” matud pa ni Ferro.
Ang buot mahitabo ni Ferro sa mga polis nga nagbantay nga pasakaan nalang dayon og kaso kadtong mga malapason sa Executive Order ni Cebu City Mayor Edgardo Labella sa ECQ protocols.
Giawhag sab niya ang mga nagbantay nga ipatuman ang maximum tolerance ug dili na lisud-lisuron ang mga authorized person outside residence (APOR) sama sa mga medical frontliners, delivery sa mga essential goods, sakop sa media ug uban pang frontliners nga exempted sa pagdala og quarantine pass. /IBM (BANATNEWS)
- Latest
