Usa sa gidakop di raliyista?

CEBU, Philippines — Bisan ang pagestambay ug pagtan-aw sa mga nahitabo o kasikas diha sa gawas sa panimalay karong panahon sa general community quarantine mamahimo kining rason aron ang usa ka tawo dakpon.

Mao kini ang nahitabo sa usa ka Clement Corominas kinsa giingong dili kauban sa mga aktibistang nag-rally atubangan sa UP Cebu Campus sa Barangay Lahug , Cebu City niadtong adlaw nga Biyernes.

 Ang mga aktibista nilusad og rally atubangan sa maong eskuylahan aron pagpadayag sa ilang pagsupak batok sa pagkapasar sa Kongreso sa Anti-terrorism Bill niadtonng Hunyo 5.

Apan tungod sa matud pa paglapas sa grupo sa social distancing nunot sa nagpadayong GCQ sa siyudad tungod sa COVID-19, gidakop sila ug gidala sa Camp Sotero Cabahug.

Apan sumala pa sa virtual press briefing sa tigpamaba sa Kabataan Partylist Howell Villacrucis ug ni King Anthony Perez, tigpamaba sa Cebu 8, sila miingon nga milabay lang si Corominas sa lugar ug pagkakita sa komosyon nihunong kini ug nagkuha og video sa iyang cellphone.

Apan giingong giapil kini pagsikop sa kapolisan.

Miranda Rights

Ang mga abogado sa walo nga gidakop naghimo na og case conference alang sa pagpasaka og kaso batok sa mga polis nga nidakop kanila. Matud pa nga ang mga gidakop wala basahi sa ilang Miranda Rights ug nanulod ang mga polis sa campus bisan og adunay UP-DND Accord nga nagdili kanila ug sa mga militar nga manulod sa bisan unsang UP Campus sa nasud.

Matud ni Perez, duna na silay daghang mga abogado kadaghanan gikan sa National Union of People’s Lawyers (NUPL) Cebu ang nitabang sa mga dinakpan ug bukas pa sila sa uban bisan di sakop sa NUPL nga gustong motabang.

“The lawyers representing our arrested persons are quite diverse. Although, this initiative in really helping the detained persons kay gi spearhead ni sa National Union of People’s Lawyers Cebu, but we welcome the help of other lawyers,” matud ni Perez.

Lakip sa motabang si kanhi former senatorial candidate Atty. Neri Colmenares.

Ang walo ka dinakpan giingong gikasohan og paglapas sa Batasang Pambansa Blng. 880 o ang paglukat og permit alang sa paglusad og susamang kalihokan, paglapas sa Article 151 sa Revised Penal Code o disobedience of any person in authority ug Republic Act 11332 o Mandatory Reporting of Notifiable Diseases and Health Events of Public Health Concern Act.