CEBU, Philippines — Gihimakak ni Mayor Gerald Anthony “Samsam” Gullas Jr. sa Siyudad sa Talisay ang mga report nga giingong adunay usa ka tawo nga gikan sa Brgy Luz, Siyudad sa Sugbo nga nakasulod sa Dakbayan sa Talisay.
Matud ni Gullas nga nitumaw ang maong report human nga adunay residente sa Barangay Biasong ang nag-facebook live.
Si Gullas nagkanayon nga ilaha karong gisusi ang maong taho ug dili angay nga mag-panic ang tanan.
Base sa report nga giingong nakaipsot ang maong tawo gikan sa lugar nga giila nga epicenter sa positibo sa covid-19 hinungdan nga sila karon nag-alerto tungod kay basin ang maong tawo nagdala usab sa maong virus.
Una niini, si Gullas niawhag sa katawhan nga mo-report gyud dayon sa ilang opisyales sa barangay o bisan kinsang tinugyanan sa balaod kon pananglit aduna silay mamatikdan nga bag-ong nawong sa ilang lugar. Kini aron masusi ug mapangutana ang maong tawo kon asa siya gikan ug masusi ang kahimtang sa iyang panglawas.
Subli nga gipahibawo ni Gullas nga sundon ang mga lagda nga ipatuman aron malikay sa virus. /BDB (BANATNEWS)