Kalihokan sa Semana Santa padayong manungtan sa teknolohiya

CEBU, Philippines — Sa unang higayon ang mga kalihukan sa Semana Santa dili na personal nga masaksihan sa mga magtutuo kondili gipaambit na ngadto sa publiko pinaagi sa television, radio ug social media inay magtapok sa mga nagkadaiyang simbahan sa nasud.

Ang pito ka pulong ni Hesus sa wala pa kini ilansang sa krus gipaambit kini sa mga nagkadaiyang relihiyon subay usab karon sa tema nga Dialogue Towards Harmony.

Matud pa ni Archbishop Jose Palma sa Archdiocese of Cebu, bisan ug karon panahona wala magtapok ang mga tawo sa Cathedral o sa bisan asa nga parukya tungod kay bawal ang panagtapok sa daghan mga tawo, mabungahon gihapon kini uban sa panaghiusa sa mga pamilya diha sa ilang mga panimalay.

Dugang pa sa Arsobispo bisan ug dili normal ang panahon tungod sa COVID-19 apan kinahanglan lang nga bukas ang tawo mamati sa pito ka pulong ni Kristo  ug mamalandong.

Matud niya ning panahon sa katalagman dala sa COVID-19 ang pagtinabangay maoy tinuod nga lamas sa tinud-anay nga pakigsandurot.

Giawhag ni Palma ang katawhan nga padayon sa pagpamati sa mga nagkadaiyang sibyananan nga mosibya sa mga kalihukan sa simbahan ilabi na karong adlawa sa Sugat sa Pagkabanhaw. /IBM (BANATNEWS)