Palm Sunday

Domingo karon  Bendisyon sa Lukay o Palm Sunday, ang mga Katolikong Kristiyano magsaulog sa malampusong pagsulod ni Hesus sa ganghaan sa Jerusalem. Karong adlawa sa maong panahon, nagpanon ang mga tawo sa ganghaan sa siyudad aron sugaton si Hesus. Diha sa ilang mga kamot ang mga lukay, ang uban giwarawara nila sa taas samtang ang uban mibutang kini sa agianan ni Hesus.

Ang lukay sa palmera usa lang ka simpleng papadayag og dakong kahinangop sa iyang pagabot. Way tukar nga banda o mga nanayaw sa karsada sama sa buhaton kun dunay mobisitang hari. Dili hari ning kalibotana si Hesus kondili sa ginghariang mas labaw pa niini, mas hamugaway, malampuson ug puno sa kalipay—gani matawag kini nga perpekto.

Ang Palm Sunday usahay tawgon sab nga Domingo sa Pasyon, tungod kay mao kini ang adlaw sa pagsugod sa Pasyon ni Kristo nga mosangpot sa paglansang kaniya sa krus.

Dili man tuod engrande ang Iyang pagabot sa Balaang Siyudad sama sa buhaton kun dunay mangabot nga hari. Ang dakong selebrasyon wala sa yuta kondili sa kasingkasing sa katawhan,,sa mga tawong nakaila kun kinsa si Hesus.

Sa samang paagi, ang selebrasyon karon dili kaayo engrande. Tungod sa hulga sa coronavirus, ang kadagkoan sa Simbahan mipadaplin lang una sa mga dagkong kalihokan o selebrasyon. Gitambagan ang tanan nga magpabilin lang sa ilang panimalay aron dili matakdan sa maong makamatay nga sakit.

Apan bisan pa niini, makatan-aw, makapaminaw gihapon ang mga tawo sa Palm Sunday Masses pinaagi sa live-broadcast sa telebisyon, radyo o live-stream sa online.

Kinahanglan lang magampo ang mga tawo gikan sa ilang balay. Nindot unta kaayo kun makatambong gyud sa simbahan ang mga tawo kauban sa ubang mga magtutuo, apan subo lang nga dili kini mahitabo tungod sa hulga sa maong virus.

Apan bisan tuod og sa balay lang karon magampo ang katawhan, wala kini magpasabot nga dili kini sama sa kabalaan o solemni diha sa simbahan. Gani, mas hilom pa ug mas lawom ang paghinulsol ug pagpamalandong sa tanan kauban ang pamilya. Ang mas dakong selebrasyon naa ra sa kasingkasing sa mga tawo, sama gihapon sa pagabot ni Hesus sa Jerusalem sa iyang panahon.

Ang pagwarawara sa lukay diha sa mga simbahan usa lamang ka simbolo sa pagtimaan sa unang Bendisyon sa Lukay. Tingali maong palmera ang ilang gigamit tungod mao lang kini ang abunda para sa mga kabus didto; praktikal sab kaayo kining gamitong pandong batok sa naglagiting nga kainit sa adlaw didto sa Jerusalem.

Gani ang dahon sa palmera daghan gihapon kaayo og gamit hangtud karong panahona. Sama dinhi sa Kabisay-an ug Mindanao,  gigamit pa sa mga maguuma ang lukay sa lubi. Pangabog sa mga mananap nga moatake sa ilang mga tanom.

Sa atong pagsaulog sa Palm Sunday, atong giampo nga mawagtang na sa hingpit ang Covid-19. Tungatunga kalisang dala niining misteryosong balatian , ang kinasingkasing ra gyud nga pagampo maoy dangpanan.  Pagkatinuod, ang pagampo maoy atong unang panagang, apan kadugayan nidako ang ulo sa tawo ug nagsalig na sa ilang kinaadman ug talento, gipadaplin na ang Ginoo.

Karon, atong sangpiton pagusab ang Ginoo aron luwason kita gikan sa coronavirus – dili tungod kay desperado na kita kondili agi og pagpakita sa atong dakong pagsalig. IBM (BANATNEWS)