Medical workers paubanan og polis

CEBU, Philippines — Gimanduan sa Cebu Provincial Police Office nga kuyogan sa kapolisan ang mga medical frontliners sa Probinsiya sa Sugbo.

Kini subay sa kamanduan ni Philippine National Police (PNP) Director General Archie Gamboa human nga naabot sa iyang buhatan ang giingong diskriminasyon ngadto sa mga medical frontliners.

Matud ni CPPO Director Rhoderick Mariano nga iya na nga gimanduan ang tanang hepe sa kapolisan sa probinsiya nga makig-alayon sa lokal nga kagamhanan kalabot sa mga health workers.

Dugang ni Mariano nga dunay polis nga mo-escort sa mga health workers paingon sa ilang destinasyon.

“The LGUs can provide vehicles for our health workers and the police will be there to escort them to their destinations,” matud ni Mariano.

Gipasabot ni Mariano nga ang paghatag og police escort ngadto sa mga medical frontliners aron nga maprotektahan sila sa krimen, diskriminasyon ug uban pa.

Kini human sa pagyabo og chlorine ngadto sa usa ka nurse sa Dakbayan sa Sugbo ug sa Sultan Kudarat sa Mindanao.

Gawas sa police escorts aduna sab gihatag nga special lanes sa mga gipatuman nga checkpoints alang sa mga medical frontliners.

“We will prioritize them so that their work will not be impeded,” dugang ni Mariano.

dugang sakyanan

Samtang giawhag ni Konsehal Dave Tumulak ang mga barangay nga motabang sa kagamhanan sa Siyudad sa Sugbo sa paghakot sa mga trabahante sa dakbayan.

Kini gumikan kay dili paigo ang mga bus nga gipadagan sa siyudad ug pipila sab niini dili haum ang oras maong kadaghanan sa mga molupyo sa siyudad nga mangompra ug manarbaho ang matanggong sa kadalanan.

Awhag ni Tumulak sa mga opisyal sa barangay nga kun mahimo gamiton ang mga service vehicles o kaha estoryahon ang mga trabahante nga magsabot kung unsa orasa kuhaon ug asa dapit ug kinsay mga ngalan niini aron dili matanggong ang katawhan nga nagtrabaho nga naa sa dalan nagpaabot og masakyan.

Samtang gipahibawo ni Cebu City Mayor Edgardo Labella nga sugod kagahapon gihatag ang financial assistance ngadto sa mga barangay.

Kini nagkantidad og P3 milyones sa una hangtud sa ika-napulo nga barangay nga daghan og populasyon; P2 miyones sa ika-11 hangtud sa 40 nga barangay ug P1 milyon sa ika-41 ngadto sa ika-80 nga barangay. Decemay P. Padilla/GMR (BANATNEWS)