NAVFORCEN nitabang sa checkpoints; Unom sikop sa curfew sa Talisay

CEBU, Philippines — Ang mga sakop  sa Naval  Forces Central (NAVFORCEN)  sa Philippine Navy ang  nitabang  na karon  sa  mga sakop  sa kapolisan  sa Lapu-Lapu  City  Police Office (LLCPO)  sa pagpahigayon og mga checkpoint alang sa pagpugong sa pagkuyanap  sa coronavirus disease (covid-19).

Si Lieutenant General Roberto Ancan, commander  sa  Central Command (CentCom) niluwat kini og nasudnong direktiba nga nagmando kanila sa pagtabang sa  pagpatuman  sa  hiningusgan nga pagbantay batok sa pagkuyanap  sa covid-19 sa  Visayas region.

Si Lieutenant Commander Neil Rafael Ybera, public affairs officer sa NAVFORCEN nibutyag nga nipadala sila og duha ka team sa ilang mga sakop  nga motabang sa kapolisan sa LLCPO.

Ang maong mga sakop sa NAVFORCEN gi-deploy kini sugod niadtong Marso 23, 2020.

Sa laing bahin, unom ka tawo lakip ang usa ka ka menor de edad ang nadakpan sa pagpatuman sa curfew kagahapon sa tungang gabii diha sa Sitio Paglaom, Barangay Bulacao, Dakbayan sa Talisay.

Ang mga nadakpan mao sila si Ralph Vosotras, 20-anyos; Ma. Cristine Jay Berigay, 47; Diether Cañeda, 22; Rustom Cañeda, 24; Edson Garinggo, 19 ug usa ka 17-anyos nga pulos nagpuyo sa maong dapit.

Matud ni Police Major Gerard Ace Pelare, hepe sa Talisay City Police Station nga nisuroy sila diha sa mga hilit nga lugar sa barangay aron ipatuman ang curfew ug ilang naabtan ang grupo sa batan-on nga nagtapok diha sulod sa computer-ran nga nag-inom. Sayo pa, si Gobernador Gwendolyn Garcia niluwat kini og kamandoan sa temporaryong pagsira sa mga internet café aron matuman ang social distancing.

Ug gidili usab karon ang pag-inom og ilimnong makahubog, mga party ug outing o bisan unsang tapok-tapok. Gabriel C. Bonjoc/BDB (BANATNEWS)