CEBU, Philippines — Gialerto sa Cebu Port Authority ang tanang pantalan sa Sugbo batok sa novel coronavirus disease (COVID-19).
Gimanduan ni CPA General Manager Leonilo Miole ang tanang port managers sa pagpatuman og body temperature check sa mga pasahero nga mosulod sa terminal pinaagi sa non-contact thermometer ug magbutang og sabon sa tanang comfort rooms sa pantalan, alcohol-based hand sanitizer sa payment counters, main entrances, office doors, passenger terminal walkways ug pre-departure areas.
Mga COVID-19 information sheets ug ubang IEC materials gikan sa DOH gipapilit sab sa Cebu base-ports ug sub-ports aron makatabang pag-isa sa public awareness mahitungod sa virus.
Subay niini gipahimutang sab ang temporary isolation rooms ug holding areas sa pantalan.
Aron epektibo kining mapatuman ang port protocol alang sa denial entry, detection ug prevention sa pagkatap sa COVID-19, wala’y mga foreign ships ang gitugutan nga makadunggo.
Ang mga crew ug pasahero dili sab tugutan nga makakanaug kun wala’y permiso gikan sa Bureau of Quarantine ug Bureau of Immigration pinaagi sa verified issuance sa free pratique, shore pass o disembarkation permit ug ubang gikinahanglang permits.
Tanang visitation privileges alang sa sa mga seafarers sa mga foreign ships ang gisuspenso sab.
Nunot niini, tanang mga barko nga midunggo sa pantalan, wharf o bulkhead gikinahanglan mobutang rat guards aron kalikayan ang pag-agi sa mga ilaga pinaagi sa barko ug pantalan.
Sa port terminal operations, nipatuman sab ang CPA og istiktong implementasyon sa guidelines ug preventive measures aron pagprotehir sa mga kawani batok sa COVID-19 subay sa direktiba ni Transportation Secretary Arthur Tugade.
Tanang frontline port personnel gimanduan sab sa pagsul-ob og personal protective equipment sama sa surgical o N95 mask, pag-mentinar sa kalimpyo sa kamot, paggamit og hand sanitizer matag karon ug unya, paglikay sa close contact ug saktong disposal sa PPE human kini magamit aron malikayan ang posibleng kontaminasyon ug protektaran ang kaugalingon nga maigo sa virus ug pagpugong nga mokatag ang virus.
Gimanduan sab ang port police sa pag-monitor sa compliance sa port stakeholders sa port protocol.
Nanawagan ang CPA sa publiko nga suportahan ang ilang gihimong lakang batok sa COVID-19.
Gisuspenso
Tungod sa hulga sa COVID-19, gisuspenso sa Civil Service Commission ang Career Service Examination sa tibuok nasud nga gikatakda unta karong Marso 15, 2020.
Ang maong exam ipahigayon unta sa 66 ka testing location lukop nasud diin moabot sa 293,845 ka indibidwal ang nakarehistro.
Sa laing bahin ang Sugat sa Lungsod sa Minglanilla magpadayon karong tuiga apan wala na ang Sugat Kabanhawan Festival tungod sa hulga sa COVID-19.
Kini ang gitug-an ni Fr. Joy Danao, team moderator sa Team of Pastors sa Archdiocesan Shrine of Immaculate Heart of Mary.
Matud ni Danao nga nasabutan na kini tali sa lokal nga kagamhanan sa lungsod. Ang Sugat ipahigayon sa kaadlawon sa Abril 12, 2020 sa oval sa Lungsod sa Minglanilla.
Samtang walay rason nga dili ipadayon ang barangay assembly sa Dakbayan sa Talisay.
Matud ni Liza Fernandez, pangulo sa Department of Interior and Local Government sa siyudad, nga magpadayon ang barangay assembly tungod kay wala silay nadawat nga kamanduan sa ilang labaw sa pagkanselar niini. Le Phyllis F. Antojado, Rowena D. Capstrano ug Gabriel C. Bonjoc/GMR (BANATNEWS)