Kalihukan sa 2021 Quincentennial kanselado

CEBU, Philippines – Daghan sa mga gihan-ay nga kalihukan sa Sugbo alang sa pagsaulog sa 2021 Quincentennial Commemorations ang hayan makanselar tungod sa nagpadayong hulga sa coronavirus disease (COVID-19).

Kini ang gipahibawo sa National Quincentennial Committee human sa ila gihimong konsultasyon sa mga stakeholders.

Naglakip sa mga gihan-ay nga kalihukan ang 7th Quincentennial Lecture Series nga himoon sa Dakbayan sa Pasay karong March 16; 7th Local Historical Committees Network General Assembly sa Abril 26 sa Dakbayan sa Sugbo, 7th International Conference of the International Council on Historical and Cultural Cooperation – Southeast Asia sa Abril 27 ngadto sa 29 ug ingon man ang paglusad sa National Memory Project sa Abril 28 sa Dakbayan sa Sugbo.

Gi-monitor, gi-quarantine

Sa laing bahin duha ka lawak ang giandam karon sa kagamhanan sa Dakbayan sa Lapu-Lapu isip isolation room kun adunay pasyente sa COVID-19.

Si Mayor Junard “Ahong” Chan ang naghimo sa maong pagpangandam isip sa pagsanong sa declaration of state of public health emergency ni Presidente Rodrigo Duterte.

“Lapu-Lapu City withholds the names of these isolation rooms to avoid unnecessary alarm,” nagkanayon ang mensahe gikan sa City Public Information Office.

Sa Dakbayan sa Mandaue, ang pangulo sa City Health Office nga si Dr. Rose Marie Ouano-Terado niingon nga adunay lima nga anaa sa ilang panimalay nga ilang gipaubos sa Person Under Monitoring.

Ang lima gikan sa Hongkong ug China nga bag-o lang namauli maong gipaubos sa 14 ka adlaw nga quarantine.

Pipila kanila nangayo og clearance sa ilang buhatan kay nagtinguha sa pagbalik sa ilang trabaho sa gawas sa nasud.

Way suspenso sa klase

Samtang gipahibawo ni Cebu City Mayor Edgardo Labella nga walay pagsuspenso sa klase sa mga tunghaan sa dakbayan tungod sa COVID-19.

Matud ni Labella nga samtang gisuspenso ang mga klase sa National Capital Region tungod sa mga nagpositibo sa COVID-19 apan sa Dakbayan sa Sugbo ipatuman ang istriktong protocol sa Department of Health.

Giawhag sab sa Hunta Probinsiyal ang Department of Education nga pamub-an ang tuig tingtungha ug tapos sa klase nunot sa hulga sa COVID-19.

Kini pinaagi sa resolusyon ni Bokal Celestino “Tining” Martinez III nga gipasar atol sa regular session niadtong Lunes. Ang awhag gitumong sa pagminus sa exposure sa mga bata ug makarisgo sa panglawas sa mga tinun-an tungod sa COVID-19. Alicia Ivy L. Chua ug Le Phyllis F. Antojado/GMR (BANAT NEWS)