Pito sa 26 ka turistang Koreano nawagtang

CEBU, Philippines — Gipangita karon ang pito sa 26 ka Koreans nga niabot sa Sugbo gikan sa Deagu City, North Gyeongsang Province niadtong Pebrero 25.

Ang mga Koreans niabot sa Mactan-Cebu International Airport usa ka adlaw sa wala pa gipatuman ang travel ban ang Pilipinas.

Matud ni Dr. Jaime Bernadas, regional director sa Department of Health 7, nga ilang giadto sa hotels ang mga Koreans apan wala na ang pito kanila.

Ang mga nawala duha ka 23-anyos nga babaye ug lalaki, 39-anyos nga lalaki, 37-anyos nga babaye, 49-anyos nga lalaki, 46-anyos nga lalaki, ug 51-anyos nga babaye.

Ang DOH-7 ug Kapitolyo nagpatabang sa kapolisan aron pagpangnita sa maong mga langyaw.

Ang nahabilin nga 19 ka langyaw ang anaa karon sa mga hotels nga ilang gipuy-an ug gipaubos sa self-quarantine sulod sa 14 ka adlaw. – Le Phyllis F. Antojado/GMR

20,000 ka bata bakunahan batok polio

Naningkamot ang Department of Health 7 nga makab-ot ang pagbakuna batok polio sa dul-an 20,000 ka bata nga nagpangedaron og 5-anyos paubos.

Ang director sa DOH-7, Dr. Jaime Bernadas, nitug-an nga 20 porsyento pa lang sa kinatibuk-an nga gidaghanon ang nahatagan na og bakuna sa nilabay nga semana Matud ni Bernadas nga adunay 20 ka bata gikan sa 27 ka barangay sa Dakbayan sa Mandaue ang gipaubos sa monitoring human kini sila gikatahong nakasinati og paralysis o pagpangluya.

Ang giingong kagaw sa polio unang nakita sa Butuanon River nga nahimutang sa Barangay Tingub sa maong dakbayan.

Ang DOH-7 nagpadayon sa ilang monitoring ilabi na sa mga kaso sa acute flaccid paralysis kon pagpangluya sa mga kaunoran o muscles sa mga bata nga maoy timailhan nga aduna silay polio. Gitug-an ni Bernadas nga sa pito ka samples nga nakuha nila sa Rehiyon 7, lima ang nagnegatibo ug duha nalang ang gipaabot nilang resulta.

Samtang gipahibawo ni Mandaue City Health Officer, Dr. Rose Marie Ouano-Terado, nga nagpadayon ang ilang house-to-house alang sa pagsuta sa mga bata nga wala pa mabakunahi. Romeo T. Limpangog/GMR (BANATNEWS)