CEBU, Philippines – Tulo ka gituohang menor de edad sa Lungsod sa Argao ang gipangita sa kapolisan nunot sa giingong pagpakatap og fake news may labot sa 2019 Novel Corona Virus-Acute Respiratory Disease.
Pipila ka post nakit-an sa Banat News nagkanayon nga adunay nCoV sa Lungsod sa Argao nga nakahatag og kabalaka sa mga residente.
Matud ni Patrolman Jed Perocho, assistant desk officer sa Argao Police Station, nga gisusi na karon sa ilang hepe sa Women and Children Protection Desk, Police Staff Master Sergeant Vivian Tamayo, ang giingong post. Dugang ni Perocho nga mohimo og imbestigasyon ang WCPD ug posibleng lakip ang mga ginikanan sa maong mga batan-on ang ipatawag usab.
Samtang mag-alayon ang Kapitolyo ug ang Police Regional Office 7 sa pagdakop niadtong mga mopakatap og fake news kalabot sa NCoV-ARD.
Ang bag-ong director sa PRO-7 nga si Brigadier General Albert Ignatius Ferro nag-courtesy call kagahapon kang Gobernador Gwendolyn Garcia sa Kapitolyo.
Ang Regional Anti-Cybercrime Unit sa PRO-7 ang mohimo sa operasyon.
Gawas sa executive order ni Garcia, ang hunta probinsiyal nipasar na sab og ordinansa nga magsilot niadtong mga mopakatap og sayop nga impormasyon bahin sa nCoV. Le Phyllis F. Antojado/GMR (BANAT NEWS)