Luna sa OPRRA pabayran sa PagIBIG

CEBU, Philippines — Human sa pipila ka tuig hingpit na nga mapanag-iya sa mga residente sa Old Philippine Railway Residents Association ang mga luna nga gipanag-iya sa Probinsiya sa Sugbo nga ilang gipuy-an.

Anaa sa 300 ka residente nga sakop sa tulo ka asosasyon nga mao ang Old Philippine Railway Homeowners Association (OPHRA), OPRRA United Homeowners Association (OUHA) ug Actual Occupants and Residents of OPRRA Kalunasan, Inc. (AOROK) ang nagpuyo sa mga luna sa probinsiya.

Aron hingpit na nila nga maiya ang luna nga gitukuran sa mga residente, kinahanglan sila makig-alayon sa PagIBIG Fund human napakyas sila nga mobayad sa 49 ka tuig nga obligasyon ngadto sa Probinsiya sa Sugbo.

“Let’s make things simple, I know nga dugay na mo gusto nga makatag-iya nang luna nga gitukuran sa inyong mga panimalay. Kanang titulo nga mapasa ninyo sa inyong mga anak ug inyong mga apo maong nakig-partner ta sa PagIBIG kay ila ning expertise, makatabang kaayo sila ninyo og daku,” matud ni Gob. Gwendolyn Garcia atol sa orientation niadtong Pebrero 5.

Si Engr. Paulino Talacay, PagIBIG Business Development Department manager, nagkanayon nga ang reappraisal sa maong mga luna nahuman na niadtong niaging buwan diin nagpakita nga ang selling price sa luna moabot na sa P10,000 ngadto sa P11,000 matag metro kwadrado base sa zonal valuation ug fair market value.

Si Engr. Miriam Loren sa PagIBIG Housing Relationship Office, nipasabot sa mga residente nga mapalit ang luna sulod sa 30 ka tuig ug mautang kini hangtud sa P6 milyones.

Kinahanglan lang nga matag pamilya adunay aktibo nga PagIBIG Fund member nga adunay 24 ka buwan nga savings nga dili sobra 65-anyos ang edad sa adlaw nga mo-apply sa loan ug sobra 70-anyos ang edad sa adlaw sa loan maturity.

Ang ubang requirements mao ang valid ID ug proof of income u gang loan mahimong bayran pinaagi sa collection servicing agreement, post-dated checks, accredited nga banko ug payment centres.

Niadtong 1971, ang Kapitolyo ug ang OPRRA, Inc. nagkauyon alang sa Sales Agreement sa 11 ka luna sa probinsiya ngadto sa mga kwalipikado nga miyembro sa OPRRA diin P10 matag metro kwadrado ang baligya.

Apan nilabay ang 40 ka tuig pakyas ang mga miyembro sa pagbayad sa maong mga luna. /GMR (BANATNEWS)