CEBU, Philippines — Padayon nga gi-monitor sa mga sakop sa nCov Incident Management Team ug Lapu-Lapu City Disaster Risk Reduction Management Office (DRRM0) ang lima nila ka mga molupyo nga gipaubos sa home quarantine sa Department of Health (DOH) 7.
Ang lima kabahin sa mga pasahero sa connecting flight gikan sa China nga mitugpa sa Mactan Cebu International Airport sa (MCIA) sa miaging semana.
Una nang gimando ni Cebu Gov. Gwendolyn Garcia nga otomatikong ipaubos sa home quarantine ang mga Pilipinong gikan sa China, samtang ang gikan sa lagyong probinsya diretsong dad-on sa quarantine area nga gitudlo sa DOH. Si Nagiel Bañacia, hepe sa CDRRMO miingon nga gitahasan sila sa Bureau of Quarantine ug Department of Health sa Central Visayas (DOH-7) nga monitoron sud sa 14 ka adlaw ang lima. Ang maong virus mopakita og sintomas sud sa 14 ka adlaw.
Ang kabanay sa lima gipahibalo na sab sa ilang mga angayang buhaton aron malikay sa maong sakit. Si Mayor Junard Chan mipasuspenso usab sa tanang mga kalihokan sa mga eskuylahan tungod sa maong sakit.
Usa ka memorandum circular sa Department of Education (DepEd) usab ang nagmando sa mga magtutudlo nga likayan ang mga kalihokang ma-expose ang mga tinun-an sa daghang mga tawo. /IBM (BANATNEWS)