Nag-post og fake news kasohan

CEBU, Philippines — Usa ka netizen nga giingong nagpakatap og post sa social media nga nag-ngong adunay pasyeneng kompirmadong nataptan og novel coronavirus ug na-admit sa tambalanan sa Dakbayan sa Talisay ang gikatakdang pasakaan og kaso sa siyudad.

Ang maong netizen nga giilang si Jewel Louie Aviso giingong nipakatap sa maong dili tinuod nga post nga nakamugna og kahadlok sa mga Talisaynon.

Giingong nangayo na og pasaylo si Alviso sa siyudad. Si Alviso giingong kanhi sakop sa Talisay Rescue Team apan nag-awol. Giingong ang rason lang ni Alviso sa pag-post niini, nabag-ohan siya sa nakita sa mga gihimong kalihokan sa mga staff sa Talisay City District Hospital tungatunga niining padayong pagdaghan sa mga kaso sa nCov.

Matud pa nga dili kadto madawat nga rason aron hatagan og kabalaka ang publiko. Ang legal team sa siyudad nag-andam na og duha ka kaso batuk niini.

Gitug-an ni Mayor Gerald Anthony "Samsam" Gullas sa pakighinabi sa Banat News anaa na karon sa iyang legal team ang kaso batok kang Alviso apan wala niya ibutyag kun unsa kining duha.

Sumala pa ni Gullas, may kamanduan si Secretary of Justice Menardo Guevarra sa paggukod sa mga tawo nga nagpakatap og ‘fake news’ bahin sa maong sakit.

Si Guevarra kinsa maoy pinasidunggang dinapit sa 1st Prosecutors League Visayas shooting competition nitug-an sa Banat News nga nagpagawas siya og department order nga nagmando sa National Bureau of Investigation sa paggukod sa mga tawo nga nagpakap aning fake news bahin sa nCov. Gitug-an ni Guevarra dili sayon ang gihimo sa gobiyerno aron mapugngan ang maong sakit mao nga dili hustong magbinuang o duwa-duwaan ang pagkatap og mga way basehang impormasyon diha sa social media.

Gibutyag ni Guevarra sutaon sa imbestigasyon kun intensyon sa nag-post aron magpanic ang katawhan. Mipasidaan si Guevarra batok sa mga tawong nagtinguha sa pagpakatap og fake news nga sila gukdon sa gobiyerno. /IBM (BANATNEWS)