CEBU, Philippines – Hugot ang rekomendasyon ni Cebu City Market Administrator Jonil Matuguina alang sa pagpahunong sa Night Market Bazaar sa dalan Colon. Kini human giingon ni Mayor Edgardo Labella nga maminaw una siya sa mga hingtungdan kung ihunong o ipadayon ang night market.
Una na nga gipahibawo ni Labella nga ang night market probationary hangtud karong buwana human sa Sinulog.
“Di siya (Labella) gusto mo-decide nga one-sided lang, paabot lang ta sa iyang final decision,” sigun ni Matuguina.
Ang mayor nagkanayon nga kinahanglan nga adunay panaghisgot bahin sa isyu aron mahibaw-an kung ang operasyon sa night market tukma nga nahimo.
“I will have to discuss with Jonil because I was told that there were some violations, there were some rules that were not followed,” matud ni Labella.
Ang night market gisugdan sa unang adlaw sa Disyembre 2019 aron mahatagan ang mga manindahay sa sidewalk og pribilehiyo nga makapamaligya gumikan sa gipatuman nga clearing operation. /GMR (BANAT NEWS)