Lima ka barangay sa Talisay nag-clearing na
CEBU, Philippines – Lima ka barangay sa Dakbayan sa Talisay ang nakasugod na sa pagtuman sa kamandoan sa Department of Interior and Local Government (DILG) nga limpiyohan sa mga ilegal nga estraktura ang mga sidewalk sa ilang lugar.
Si Jonathan Tumulak, hepe sa City of Talisay-Traffic Operation and Development Authority (CT-TODA) sa dakbayan nitataw nga si Liza Fernandez, pangulo sa DILG sa siyudad nipahibalo sa mga kapitan sa 22 ka barangay sa himuon nga clearing operation.
Ang mga barangay nga nakasugod na sa clearing mao ang Barangay Tanke, Lawaan 3, Pooc, Poblacion ug Tabunok.
Gawas niini, ang mga traysikol ug traysikad ang gidid-an na sa pag-agi sa mga national road.
Ang CT-TODA mopahigayon og sunod-sunod nga tigom tali sa mga maapektohan nga drayber.
Samtang si Mayor Gerald Anthony “Samsam” Gullas Jr. nagkanayon nga iyang gipahimangnoan ang mga kapitan nga mosunod ug makig-alayon sa CT-TODA.
Gilauman nga ang ubang barangay sa siyudad mosunod usab sa paglimpiyo sa mga sidewalk sa ilang lugar.
Gikatakdang karong Pebrero 10, 2020 mopahigayon og inisyal nga pakisusi ang CT-TODA diha sa kabarangayan pagpiho kong nituman ba kini sa kamandoan. /BDB (BANAT NEWS)
- Latest
