CEBU, Philippines – Pormal na nga nihangyo ang magsisibya ug kolumnista nga si Pablito “Bobby” Nalzaro sa buhatan sa Ombudsman nga mohimo og lifestyle check sa regional director sa Land Transportation Office 7 nga si Victor Emmanuel Caindec.
Gibanatan ni Nalzaro si Caindec human mismo ang amahan niini nga si Victorio “Sonny” Caindec nipasangil nga ang iyang anak nakaangkon og lima ka bag-ong mga sports utility vehicles sa duha pa lang ka tuig niya sa pwesto sa LTO-7.
Gihagit ni Nalzaro si Caindec nga ipakita ang iyang Statements of Assets, Liabilities and Net Worth (SALN) sukad sa iyang paglingkod sa LTO-7 hangtud karon kun kini walay gitago.
Apan gihulga na hinoon si Nalzaro ni Caindec nga ikiha human sa sagunson nga komentaryo niini sa iyang programa sa DYSS nga “Saksi” ug sa iyang lindog sa pamantalaan.
Matud ni Nalzaro nga pinaagi sa lifestyle check malimpyo ang ngalan ni Caindec kung wala siyay tinagoan apan kung anaa, angay lang sab siya manubag sa balaud.
“Panic na ka Bob? How thorough. Publicity stint sa tao nga wala nay credibility,” tubag ni Caindec pinaagi sa post sa iyang Facebook. /GMR (BANAT NEWS)