Direksiyon sa hangin gi-monitor; Palma niawhag sa pag-ampo

CEBU, Philippines – Gi-monitor sa Department of Health (DOH)-7 ang posibleng pag-abot sa abo dinhi sa Sugbo gikan sa Batangas tungod sa pagbuto sa Bulkang Taal.

Si Dr. Van Phillip Baton, medical officer sa DOH-7 nagkanayon nga nakig-alayon sila sa Philippine Atmospheric Geophysical Astronomical Services Administration (PAGASA) aron pagsuta sa direksiyon sa hangin kon aduna bay posibilidad nga moabot dinhi sa Sugbo ang gibugang abo sa bulkan. Gitataw ni Baton nga sa kasamtangang luwas pa gihapon ang hangin nga mahanggap sa mga Sugbuanon.

Awhag hinuon ni Baton ngadto sa mga tawo nga nagplano sa pagbiyahe paingon sa Luzon nga i-oktaba lang una kini hilabina kon adunay gihambin nga sakit ug allergies o adunay hubak ug uban pang respiratory problem.

Matud ni Baton nga ang pagka-expose sa ash fall posible kining maka-irritate sa tutunlan sa tawo nga moresulta sa inflammation ug infections nga mo-develop sa sakit nga pneumonia.

Gawas niini, maka-trigger usab kini sa sakit nga hubak hinungdan nga iyang giawhag ang publiko nga mangayo una og clearance sa ilang doktor sa dili pa mobiyahe ngadto sa kaulohan.

Nunot niini, si Archbishop Jose Palma sa Archdiocese of Cebu niawhag sa katawhan sa pag-ampo niining pagbuto sa Bulkang Taal.

Matud ni Palma nga gilantaw usab nila karon ang posibleng tabang alang sa tanan nga naapektohan sa maong katalagman. Ang Archdiocese of Cebu nipagawas og Oratio Imperata alang sa trahediya sa Bulkang Taal nga pagaampuon sa tanang mga parokya.

Ang Catholic Bishop Conference of the Philippines (CBCP) nipaabot na usab sa ilang hinabang ngadto sa mga biktima sa pagbuto sa Bulkang Taal. /BDB (BANAT NEWS)