CEBU, Philippines – Gisakmit sa kapolisan sa Cebu City Police Office ang usa ka drone human kini gipalupad atol sa prosesyon sa Walk with Jesus kagahapon sa buntag.
Matud ni CCPO Director, Police Colonel Engelbert Soriano, nga ang drone gipanag-iya sa usa ka pribadong tawo.
Ila kini gisita ug giimbitar sa buhatan aron sukit-sukiton tungod kay nagpalupad kini sa drone nga walay pagtugot gikan sa kapolisan.
Gipasabot ni Soriano nga tungod sa kahigpit sa seguridad, kinahanglan nga rehistrado sa Police Regional Office 7 ang drone nga ipalupad atol sa Sinulog 2020.
Ang maong lakang gibuhat alang sa luwas nga kapistahan ilabi na nga minilyon nga turista ang mosaksi sa gitawag nga inahan sa mga festival sa nasud. /GMR (BANAT NEWS)