CEBU, Philippines — Gitinghuha sa Police Regional Office (PRO)-7 nga adunay motahan nga miyembro sa New People’s Army (NPA) atol sa selebrasyon niini sa sunod semana.
Ang direktor sa PRO-7 Police Brigadier General Valeriano De Leon nipadayag sa nahisgutan niyang tinguha.
Matud ni De Leon nga gikinahanglan usab sa kapolisan ang tabang sa komunidad batok sa komunistang grupo kinsa giingong mang-recruit og mga batan-on.
Gimandoan usab ni De Leon ang kapolisan sa Central Visayas ilabi na sa Probinsiya sa Negros Oriental nga kanunayng alerto ug palapdan pa ang pagpahigayon og intelligence gathering kalabot sa kalihukan sa NPA sa Central Visayas.
Samtang si Gobernador Gwendolyn Garcia nagkanayon nga siya maoy unang nagdeklara nga all-out war sa Probinsya sa Sugbo batok sa mga NPA niadtong tuig 2007-ngadto sa 2008.
Giingong siya usab kaniadto ang nangulo sa Regional Peace and Order sa Central Visayas diin nahimong insurgency free ang tibuok Probinsiya sa Sugbo.
Ang kagamhanan sa probinsiya niumol kini og mga programa aron motahan ang mga sakop sa NPA ug ubang rebedling pundok diin lakip sa programa ang paghatag kanila ang panginabuhian. /BDB (BANATNEWS)