Lima ka fire volunteers positibo sa drugas

CEBU, Philippines – Dugang 11 ka trabahante sa Cebu City Hall ug mga fire volunteers ang nagpositibo sa paggamit og ilegal nga drugas.

Si Jonah John Rodriguez, pangulo sa City Office for Substance Abuse Prevention niingon nga ang lima gikan sa tulo ka departamento diin duha ang gikan sa City Treasurer’s Office; duha sa City Funded Barangay Health Workers, ug usa gikan sa Anti-Mendicancy.

Samtang unom sa 195 ka fire volunteers ang napakyas sab sa drug screening.

Nunot niini niabot na sa 57 ka trabahante sa City Hall ang nagpositibo sa ilegalnga drugas sa surprise drug screening sa COSAP sugod niadtong NobIyembre 8, 2019.

Samtang hingpit na gyud nga nakatapos ang 25 ka drug surrenderees sa Lungsod sa Consolacion sa gipasiugdahan sa lokal nga kagamhanan nga rehabilitation program.

Isip kamatuoran mao ang ilang pagdawat og certificate nga gihatag sa Barangay Anti-Drug Abuse Council (BADAC) ug Municipal Anti-Drug Abuse Council (MADAC) nga nagtinabangay sa pagpasiugda sa maong rehab program.

Si Abellardo Banuag nga usa ka psychologist nga maoy nangulo sa maong rehab program niingon nga ilang gisugdan ang rehabilitation program nga giapilan sa 40 kapin ka drug addicts nga giindosar sa mga barangay kapitan.

Sa maong gidaghanon, ang 25 lang gyud kanila ang nakalahutay sa matag adlaw nilang rehab program nga ilang gisugdan niadtong Oktubre ug hingpit nga gitapos kagahapon isip ilang graduation.

Si Banuag niingon nga kadtong kabahin sa bag-o lang nga nakatapos sa ilang rehab program nga nilungtad og unom ka buwan ang mahimo nga mobalik apan adto na gyud sa mga dagku nga rehabilitation facilities sa gobiyerno o pribado.

Dugang pa ni Banuag nga daku kaayo og gikatampo ang suporta sa matag nalambigit sa ilegal nga drugas ang hugot nga suporta sa ilang mga sakop sa pamilya alang sa pagpahimulos sa rehab program nga gipasiugdahan sa lokal nga kagamhanan.

Matud ni Bise Mayor Teresa Alegado nga ilang gipasiugdahan ang pagpaubos sa rehab program sa mga niangkon nga sila nagumon sa paggamit sa ilegal nga drugas sa pagpakita sa ilang kamahinungdanon sa ilang pagbag-o sa kinabuhi ug pagpakita sa kagamhanan sa pagtagad sa ilang kahimtang.

Kini gisuportahan usab sa anak nga si Mayor Joannes Alegado kinsa niingon nga ang maong programa nga ilang gipasiugdahan ilang ipadayon hangtud sa mosunod pa nga mga tuig sanglit tingu ha nila ang pagbag-o sa kinabuhi niadtong mga nalambigit sa ilegal nga drugas sa dili pa mahingpit nga maguba ang maayo nilang kaugmaon.  /GMR (BANAT NEWS)