CEBU, Philippines — Sakyanan nga gisakyan sa duha ka mananagat ang natikyaob human kini hapaka og dakong bawod niadtong Biyernes sa gabii diha sa kadagatan sa Barangay Poblacion, Lungsod sa Oslob.
Hinuon naluwas sa maong insidente si Cecilio Espedillon, 50-anyos ug ang kauban niini nga padayon pa nga giila.
Matud sa tigpamaba sa Philippine Coast Guard Central Visayas Lieutenant Junior Grade Michael John Encina nga niadtong higayona padulong na sa baybayon sa Barangay Poblacion ang mga biktima aron i-secure ang ilang sakayan apan gihapak kini og dagkong balod hinungdan nga natikyaob ang ilang sakayan.
Ang duha ka mananagat dihang natikyaob na ang ilang sakayan dali kining nisawom ilawom sa dagat ug nilangayo paingon sa baybayon ug nangayo og tabang sa mga estambay.
Matud usab ni Encina nga human nila nadawat ang report dali usab silang niresponde ug nitabang sa mga mananagat.
Ang nahisgutang mga mananagat dali nilang gidala diha sa Oslob District Hospital alang sa medical assistance. /BDB (BANATNEWS)