Pagbantay sa duha ka taytayan hugtan pagbalik

CEBU, Philippines — Gipahugtan pa sa kapolian ang ilang pagpatrolya sa duha ka taytayan nga nagdugtong sa Dakbayan sa Mandaue ug Dakbayan sa Lapu-Lapu.

Kini human sa labing ulahing nahitabo niadtong niaging Biyernes sa gabii nga may nilayat nga usa ka tawo nga naanod sa parola sa Lungsod sa Liloan ug naluwas sa mga mananagat.

Si Police Colonel Clarito Baja, direktor sa Lapu-Lapu City Police Office, niingon nga iyang pakigkitaan ang mga nga nadestino sa pagpatrolya sa Marcelo Fernan Bridge ug Mactan-Mandaue Bridge. “Dili man gyud malikayan nga malipat atoang personnel, pero kailangan gyud i-remind,” matud ni Baja. Dugang pa niya nga ilang ipadayon ang hugot nga pagbantay sa nahisgutang mga taytayan sa ingon nga paagi kapugngan usab nga adunay dautang mahitabo sa nahisgutang mga taytayan.  Naglakip na niini ang pagbantay sa duha ka tiilan sa maong duha ka taytayan pinaagi sa foot patrol nga himoon sa kapolisan ingon man ang pagsakay og motorsiklo ug patrol car sa nagbantay nga mga polis sa paghatag og kasegurohan.

Gitataw hinuon niya nga sukad nga ilang gipatuman ang 24-oras nga pagbantay sa duha ka taytayan sugod niadtong Agosto wala sila kadawat og taho nga aduna pay nahitabong paglayat hangtud niadtong Biyernes sa gabii. Si Baja niingon nga ang labing ulahi nga insidente ang maisip nga nagpahinumdum sa mga polis nga gidestino sa maong dapit nga kinahanglan gyud nga himoon nila ang pagbantay sa ingon kalikayan nga mahitabo pa nga aduna magpakamatay pinaagi sa paglayat sa taytayan.

Samtang si Police Major Mercy Villaro, Public Information Officer sa Mandaue City Police Office, niingon nga ilang gihimo ang hugot gyud nga pagbantay sa duha ka taytayan pinaagi sa duha nila ka polis nga magpuli-puli og duty. “Basta magbinantayon lang ang mga polis aron kalikayan nga adunay pay laing mahitabo sa maong dapit,” matud ni Villaro. /GMR (BANATNEWS)