Wala magpa-census gipasakaan og kaso
CEBU, Philippines — Nasikop ang usa ka lalaki kinsa giingong wala magpa-census sa Philippine Statistics Authority (PSA) human kini gireklamo ngadto sa mga otoridad sa Dakbayan sa Mandaue sa nilabayng adlaw.
Giila ang dinakpan nga si Cirilo Quizon, taga Palm Hills, Barangay Basak, Dakbayan sa Mandaue. Si Municipal Trial Court in Cities (MTCC) Judge Amy Rose Rellin sa Branch 3 niluwat og warrant of arrest batok kang Quizon.
Matud ni Noel Rafols, information officer sa PSA nga si Quizon giadto sa ilang balay alang sa pag-census sa PSA.
Ang maong pag-census adunay kalabutan sa Annual Survey of Philippine Business and Industry.
Gibutyag ni Rafols nga duha na kahigayon nga nibisita sa panimalay ni Quizon ang surveyor sa PSA ug giingong nagdumili kini sa pagpa-census.
Hinungdan nga gikonsulta nila kini sa ilang Legal Division sa PSA ug gipasakaan og kaso nga kalapasan sa Section 25 nga mao ang “Obligation to Provide Information” sa Akta Republika 10625 kun “The Philippine Statistic Act of 2013” si Quizon.
Giingong atol sa pag-serve sa warrant of arrest si Quizon nihimakak kini sa pasangil batok kaniya.
Si Quizon nibayad kini og P6 mil nga piyansa ngadto sa MTCC alang sa iyang temporaryong kagawasan. (/BDB)(BANATNEWS)
- Latest
