Mga testigo sa Navarro ambush gi-subpoena sa CHR7

CEBU, Philippines – Mga kauban ni kanhi Clarin, Misamis Occident Mayor David Navarro gipatawag sa Commission on Human Rights (CHR)-7 aron mohatag og katin-awan bahin sa pagpatay sa mayor duha ka semana na ang nakalabay.

Gibutyag sa Chief Investigator sa CHR-7 Leo Villarino sa CHR-7 nga gi-subpoena nila ang maong mga tawo aron mopatim-aw karong Nobiyembre 11 nunot sa gihimo sab nilang imbestigasyon.

“Katong subpoena, includes the chief of Station 2 si Major (Eduard) Sanchez ug katong police nga nasamad ug katong diha sa Mahindra ug katong dihay nakuyog sa Starex van, also ato pud i-apil sa atong investigation although tua ni sila karon sa Clarin but still we still get them to testify in our investigation duna man tay Regional Office didto possible that will be the venue kay layo naman kaayo kung paarion nato sa Cebu,” asoy ni Villarino. Makig-alayon sab sila sa National Bureau of Investigation (NBI)-7 nga mao na karoy lead agency nga naghimo sa imbestigasyon sa kamatayon ni Navarro. Ilang tan-awon sa imbestigasyon kun dunay basehan aron morekomendar sila og pagpasaka og kasong kriminal o administrative charges sa mga hingtungdan.

Si Navarro padulong kining mopiyansa sa City Prosecutors Office sa  iyang kaso nga physical injury, usurpation of authority ug Act of Lasciviousness human kini giingong nangulata ug nagbinastos ug masahista sa dihang gibabagan ilang convoy ug pugsanon siyang gibunlot gikan sa patrolcar ug gipatay.

Sumala pang Villarino, mandato nila paghimo og imbestigasyon ug kaayohan usab kini sa mga polis aron mawala ang pagduda sa katawhan.

Ang NBI nakig-alayon na sa pamilya ni Navarro alang sa pormal nga pagsugod sa ilang imbestigasyon.

Matud pa ni Atty. Tomas Enrile, NBI-7 Regional Director, adunay siyay duha ka agents nga gipadala didto Clarin alang niini. (/IBM)(BANAT NEWS)