CEBU, Philippines — Nikabat sa 13 ka tenants diha sulod sa usa ka dakong mall sa Barangay Pondol, Lungsod sa Balamban ang gikatahong biktima sa lungkab kagahapon.
Matud ni Police Staff Sergeant Excelseor Aguanta, desk officer sa Balamban Police Station nga alas 12:10 sa hapon nitaho sa ilang buhatan ang usa ka empleyado sa tenant sa mall uban sa head guard tungod kay giingong gilungkaban ang ilang money changer.
Si Aguanta nagkanayon nga wala sila’y nadawat nga taho gikan sa security sa mall diin sayo sa buntag kagahapon nasayran ang insidente aron unta nila mapreserba ang lugar diin nahitabo ang pagpanglungkab.
Matud usab ni Aguanta nga atol sa pagsusi sa ilang imbestigador nasuta nga 13 ka tenants sa mall ang nabiktima sa pagpanglungkaban sa wala mailhi nga mga kawatan.
Ang kapolisan sa lungsod nagpahigayon og follow-up nga imbestigasyon sa maong insidente.
Ang kapolisan nisusi usab sa mga footage sa Close Circuit Television (CCTV) camera sa maong establisamento. BDB (BANATNEWS)