Mayor Navarro gi-ambush

Cebu, Philippines — Patay ang kontrobersiyal nga mayor sa lungsod sa Clarin, Misamis Occidental Mayor David Navarro human kini gi-ambush sa gibanabanang napulo ka mga wala mailhing armadong mga lalaki usa ka gatos ka metros gikan sa Cebu City Prosecutor’s Office diin unta kini basahan sa iyang kaso kagahapon sa udto.

Si Navarro sakay sa patrolcar uban ang upat ka polis, hasta ang hepe sa Clarin Police Station nga si Police Captain Jun Matugas, duha ka igsuong babaye ni Navarro nga si Novie Grace Navarro ug Princess Carmel Navarro Madarang.

Ang grupo gikuyogan og laing patrolcar nga gisakyan sa hepe sa Abellana Police Station Chief, Police Major Eduard Sanchez nga naguna kanila samtang dunay laing van nga nagsunod nga gisakyan sab sa mga sakop sa mayor. Si Police Master Sergeant Carlo Balasoto usa sa mga police escort sa mayor miingon nga padung na sila mosulod sa gate sa Prosecutor’s Office sa dihang kalit silang gibabagan og sakyanan ug nanganaog dayon ang napulo ka armadong mga lalaki.

Ang duha giingong nidiretso og duol sa ilang patrolcar ug pugsanong gibunlot ang mayor ug pagkahuman girakrakan kini. “Paspas kaayo ang sitwasyon kay pag-abot namo diha, paghunong na, naka posting na sila (perpetrators) ..naka-van,” matud pang Balasoto sa mga tigbalita.

“Igo ra mi nilang gipahapa, dayon gibira nila si Mayor pagawas, dira na gibirahan,” dugang pa niya. Sumala pa niya ang mga armado nagdala og mugbo nga armas ug ang uban armado og M16 rifles.

Usa ka Police Corporal Catalan usab ang naangol human naigo sa tiil, ug tulo sab ka mga sakop sa mayor ang napiskan sab og splinters.

“Nanawag nalang nako ang driver (of the patrol car boarded by the mayor) nga gi ambush sila, Mao ‘to namalik mi, katong mga suspek nanagan na,” sumala pang Sanchez.

Ang igsuon ni Navarro nga si Madarang emosyonal nga nitingog ug nangutana kun may hustisya ba para sa ilang igsuon. Sumala pa niya nalisang gyud siya sa kadaghan sa mga armadong mipasipala sa iyang maguwang.

Sa pikas bahin, gipahibalo ni Sanchez nga apil sa ilang pasakaan og kaso ang tulo ka giingong bodyguards ni Navarro nga nakuha sa CCTV sa pagkulata sa 23 anyos nga masahistang si John Buenas.

Kasong physical injury, acts of lasciviousness ug usurpation of authority ang ipasaka batok sa mayor ug physical injuries sa tulo niini ka sakop.  Si Navarro gidala sa piskalya tungod sa tulo ka kasong gipasaka sa babaye og lalaking masahista nga gikulata ug giingong gibastos sa maong opisyal diha sa massage parlor sa miaging gabii.

Ang mayor daan ng mihimakak sa pasangil ug miingon nga siya maoy gibastos sa mga empleyado. Ang hitabo nakuha sa CCTV camera.

Padayon pa ang gihimong imbestigasyon sa maong ambush. Si Navarro naapil sa narco-list ni Presidente Duterte nga gipublikar niini niadtong tuig 2016 ug 2019.

Sa wala pa dad-a si Navarro padung sa piskalya, mihangyo pa kini kang Sanchez nga magpa-hospital arrest lang kini tungod kay naghuot iyang dughan , apan wala kini tugoti ni Police Brigadier General Valeriano De Leon sa paglikay nga mapasanginlang dunay special treatment.

Dugang pa ni Sanchez. tulo ka kaso ang ilang ipasaka sa Mayor kini nanglangkob sa Physical Injury, Act of Lasciviousness ug Usurpation of Authority human kini nagpaila nga mayor. Si De Leon sa iyang bahin miingon nga gimandoan siya ni Officer-in-Charge, PNP Lt. Gen. Archie Gamboa pagumol og Special Investigation Task Group (SITG) David Navarro aron motutok sa maong kaso ug aron mataral sa hukmanan ang mga naghimo niini. IBM ( BANAT NEWS)