Naligsan ang ulo
CEBU, Philippines — Patay ang usa ka truck boy sa garbage truck human kini naunay ug nalatayan sa ligid sa iyang gisakyan sa dihang kalit kining nilayat nga wala mabantayi sa iyang drayber samtang nagkolekta og basura diha sa Barangay Lagtang Dakbayan sa Talisay, Sabado sa buntag.
Ang nakalas naila nga si Victor Baranggan, 47, residente sa Sambagan sa maong barangay.
Samtang ang drayber naila nga si Ulysses Cabuenas, 63, biyudo ug residente sa Creekville ug nagmaneho sa Isuzu Dumptruck (garbage truck) nga adunay plate number SJF 611 nga iya sa Barangay Lagtang.
Matud pa ni Patrolman Frank Alemento, Desk Officer sa Lawaan 1 Substation base sa nakuhang impormasyon sa imbestigador gikan sa driver nahibulong nalang kini sa iyang pagmaneho adunay nibuto ug niuntol ang iyang gimanehong trak.
Sa dihang iyang gilili sa side mirror ang truck boy diay niini ang nalatayan ang ulo. Nasayran nalang niya nga niambak ang biktima nga wala moabiso kaniya.
Sumala pa ni Alemento, patay diha-diha dayon si Baranggan human nalatayan mismo ang ulo niini sa tuong ligid sa maong garbage truck. Dugang pa ni Alemento, base sa pangangkon sa driver usahay mokalit ra gayud ug layat si Baranggan ka naanad na kini. Apan nianang higayona gituohang nawad-an kini og balanse ug nabangil na hinuon sa ligid ug naligsan.
Ang driver kasamtangan nga gitanggong sa kapolisan apan pabuhian karong adlawa kay dili interesado ang pamilya sa nakalas nga mopasaka og kaso tungod kay managsilingan ra sila basta motabang lang ang driver sa pagpahiluna sa patay nga lawas ni Baranggan. (/IBM)(BANATNEWS)
- Latest
