Lalaki migakos sa ligid sa trak, kinatawo napusa
CEBU, Philippines — Kritikal ang usa ka wala pa mailhing lalaki human kini giingong mihamag ug migakos sa ligid sa garbage truck nga nag-aginod diha sa MJ Cuenco Avenue, eskina sa dalan T. Padilla kagahapon sa buntag.
Matud pa ni Police Staff Sergeant Edgar Baton, imbestigador sa Waterfront Police Station sa Cebu City Police Office ang biktima gidala sa tambalanan human nga ang iyang kinatawo maayong pagkapusa sa ligid sa maong trak.
Si Baton miingon nga ang maong trak gimaneho ni Rogelio Roca, 51, nagdagan padulong sa Barangay Caretta para mangolekta og basura, apan gikatahong kalit lang milukso ug migakos sa ligid ang wala mailhing lalaki.
Ang upat ka garbage loaders misyagit kang Roca aron aron malihayan ang maong lalaki apan nakagakos gyud kini sa ligid ug naipit iyang bugan ug nagkadugo.
Sa inisyal na imbestigasyon, walay nakaila sa maong lalaki apan ang mga saksi nagduda nga aduna kini problema sa pangisip.
Gitanggong karon ang driver sa truck diha sa Waterfront Police Station alang sa posibleng kaso nga Reckless Imprudence Resulting to Physical Injury nga ipasaka batok niya.
Si Police Major Joemar Pomarejos, Police Station Chief sa Waterfront Police Station mibutyag nga ang tag-iya sa among garbage truck nakigalayon na kanila aron maoy mogasto sa pagpatambal sa maong lalaki. (IBM) (BANATNEWS)
- Latest
