CEBU, Philippines – Hingpit nga giparelibohan ang pangulo sa mga social workers sa home care sa kagamhanan sa Dakbayan sa Lapu-Lapu nga gireklamo sa lima ka batang babaye sa giingong dili maayong pag-atiman kanila hinungdan sa suway nga paglaslas gigamit ang hait nga lata sa sardinas.
Si Mayor Junard “Ahong” Chan atol sa press conference nibutyag nga ang mga batan-ong nag-edad og 9, 10 ug 12-anyos kinsa dali nga napugngan sa nakakita nilang kauban nga mgabatan-on sa nahisgutang dormitory.
Ang giparelibohan sa ilang katungdanan sa pagdumala sa home care sa kagamhanan sa dakbayan mao sila si Letecia Patalinghug, social officer IV ug Virginia Dihayco, social worker assistant.
Maoy gihulip kanila sa ilang katungdanan ang duha ka social workers nga sila si Charito Bering ug Cheris Raquel Montebon.
Matud ni Chan nga nakadawat na lang siya sa maong kasayuran pinaagi sa gipadalang suwat sa maong mga bata sa iyang buhatan nga nag-asoy sa ilang reklamo ug nangayo og panabang sa iyang sa iyang buhatan.
Naglakip sa mga reklamo ang giingong kanunay nga pagpangasaba ngadto kanila nga 29 ka bata nga anaa nagpuyo sa sulod sa dormitory sa home care.
Dugang nilang reklamo mao ang pagtunga sa gamay kaayong sabon nga ilang gamiton sa ilang pagkaligo nga molungtad og usa ka semana nilang paggamit niini.
Ang lain nilang reklamo mao ang pagpakaon kanila kanunay og sardinas, linat-ang monggos ug ingon man expire na nga pan ug junk foods nga maoy nagsilbi nilang snacks.
Gireklmao usab sa mga bata ang kanunay nga pagdili kanila nga mogawas sa ilang lawak nga nakahatag kanila og kapuol sa ilang pagpuyo sa pasilidad kay higpit man silang gidid-an sa pagduwa.
Si Lapu-Lapu City Social Welfare Officer Carmelita Degamo nga nakalitan sa gipadangat nga reklamo sa mga bata niingon nga ang girelibohan nga mga nagdumala sa home care ang iyang ibalhin ngadto sa laing buhatan samtang himoon pa nila ang ang imbestigasyon. (/GMR)(BANAT NEWS)