Oponganon giawhag sa pagmentinar sa kalimpiyo

CEBU, Philippines — Giawhag ni Mayor  Junard  Ahong  Chan ang tanang sektor nga mga Oponganon sa paghiusa alang  sa pagmentinar  sa kalimpiyo sa palibot pinaagi sa dili pagpataka og labay  sa mga basura.

Si Chan maoy nangulo sa mga opisyal ug mga kawani sa kagamhanan sa siyudad sa gipahigayon nga National Clean Day kagahapon.

Ang maong kalihukan gibuksan pinaagi sa gipahigayon nga programa nga giapilan sa mga opisyal sa barangay, mga tinun-an ug mga magtutudlo sa pribado ug publikong tulunghaan.

Dugang nga nisalmot sa kalihukan sa pagpanglimpiyo mao ang mga sakop sa   kapolisan sa Lapu-Lapu  City  Police  Office (LLCPO), mga sakop  sa Bureau of  Jail  Management  and Penology (BJMP) ug Bureau of Fire Protection sa maong dakbayan.

Naglakip sa nahipos nilang mga basura mao ang mga plastic bag, mga basiyo sa mineral water nga gituohang gipanglabay diha sa dalan o kadagatan.

Ang mga natigom nilang basura gisulod kini sa sako ug gihakot ngadto sa ilang Material  Recovery  Facility (MRF) diha  sa Sitio  Soong sa Barangay Mactan sa maong dakbayan.

Samtang kagahapon usab sa buntag  kapin sa 5,000 ka kilo nga basura ang nakolekta sa gipahigayong clean-up drive diha sa coastal area  sa Barangay Laray  sa Lungsod sa  Consolacion

Ang maong kalihukan kabahin usab sa pagsaulog sa  International Coastal Clean-up Day  nga giapilan  sa kapin 200 ka tawo kauban  sa mga opisyal sa lungsod, mga lumulupyo kinsa niboluntaryo sa pag-apil sa kalihukan. (/BDB)(BANATNEWS)