CEBU, Philippines – Mibahad si Mayor Junard Chan sa pagdakop ug pagpasaka og kaso sa mga traffic enforcers sa Dakbayan sa Lapu-Lapu nga nalambigit sa mga illegal nga kalihokan sama sa pagpangilkil.
Giluwatan ni Chan ang maong pagbahad human sa pagkasikop sa kanhi traffic enforcer sa City Traffic Enforcement and Management System (CTMS) sa entrapment operation sa City Intelligence Branch (CIB) sa Lapu-Lapu City Police Office (LLCPO) niadtong miaging adlaw.
Giawhag ni Chan ang publiko kun kinsa kanila ang nabiktima sa pagpangilkil sa mga traffic enforcers ilabi na niining suspek nga nadakpan nga si Antonio Dungog Miano, 57.
Si Miano nadakpan sa sulod sa usa ka kan-anan sa Barangay Pajo sa grupo ni Lieutenant Colonel Mark Gifter Sucalit sa Criminal Investigation Branch tungod sa reklamo sa usa ka drayber nga iyang nadakpan ug giingong gipangayoan niini og P5 mil bugti sa pekeng temporary plate nga ihatag niini.
Kasong robbery extortion ug usurpation of authority ang ipasaka batok ni Miano. Nakuha gikan ni Miano ang mga ebidensiya sama sa unom ka P500, mga fake nga plate numbers, hand held radio , ID isip CTMS enforcer ug cellular phone. (/IBM)(BANAT NEWS)