CEBU, Philippines — Plano ni PRO-7 Regional Director, Police Brigadier Debold Sinas nga padugangan og dos mil ka mga polis ang isla sa Negros aron mas mapalig-on pa ang seguridad ug mamentinar ang kalinaw sa isla nunot sa nanglabay nga sagunson nga mga pagpatay didto.
Si Sinas namahayag niini atol sa Senate Hearing bahin sa nahitabng mga pagpatay didto sa Negros. Si Sinas mibutyag nga mao kini ang iyang gisugyot kang Senador Ronald ‘Bato’ dela Rosa niadtong nakalabay nga adlaw’ng Martes. Sa usa ka press-conference nga gipatawag ni Sinas niadtong adlaw nga Biyernes masaligon siyang suportahan sa mga senador ang iyang sugyot nga dugang pwersa sa kapolisan didto sa maong isla.
“We are able to recommend to help us,”sigun ni Sinas.
Si dela Rosa kinsa kanhi PNP Director General sa wala pa napiling senador nangutana kang Sinas kung unsa iyang matabang sa problema sa Negros.
“Bold, how can we assist you in the Negros problem?”si Sinas miingon bahin sa pangutana sa senador nga iyaha sab gitubag nga nagkinahanglan kini og dugang dos mil ka polis nga permanenteng idestino didto Negros. “Sabi ko, Sir give us a quota of 2,000 men to be assigned in Negros, but ang difference kasi pag ni recruit natin ‘to, hindi na sila ma pull out,” si Sinas sa iyang tubag kang dela Rosa.
Sumala pa ni Sinas, lahi ra gyud kun ang mga pulis permanente ang presensya sukwahi sa pagpadala lang og dugang mga tropa gikan sa PNP-Special Action Force (SAF) nga bisan unsang orasa mahimong i-pullout aron ipadala sa ubang lugar.
Matud niya ang permanenteng presensya sa maong dugang pwersa makatabang gyud og dako sa pagpadayon sa kalinaw sa lugar.
Bisan ang mayor sa Guihulngan City ug Canlaon City Mayor nga nanambong sa maong hearing nidason sab nga kinahanglan sila og dugang mga polis sa Negros.
Ang Guihulngan ug Canlaon City duha lamang sa mga lugar sa Negros diin nahitabo ang mga pagpamatay.
“Ang gusto nila dugangan pa. Almost all the mayors of Negros Oriental nangayo’g polis. Limited pud mi kay naa man pud laing mga areas nga nangayo’g polis,” si Sinas miingon.
Magagikan ang kamandoan sa Camp Crame ug malaumon kini nga mahatag ang iyang hangyo.
Sa pagkakaron, ang Negros Oriental adunay gibanabana nga regular nga 1,600 ka mga pulis nga gisuportahan lang og duha ka mobile force. (/IBM)(BANATNEWS)