CEBU, Philippines — Makapahimulos ang mga molupyo sa Isla sa Olango sa gitanyag nga calamity loan sa gobiyerno. Kini nunot sa epekto sa dili maayong panahon ngadto sa panginabuhi sa katawhan sa isla. Ang mga kwalipikado nga mga residente makapahimulos sa calamity loan sa Government Service Insurance System (GSIS) alang niadtong mga kawani sa gobiyerno ug Social Security System (SSS) ingon man sa Home Development Mutual Fund (HDMF) alang niadtong nagtrabaho sa pribado nga mga kompaniya.
Ang aktibong sakop sa GSIS nga niabot na og labing ubos tulo ka buwan nga gidugayon ang mahimo nga makapahimulos sa P40,000 nga emergency loan nga bayaran usab sulod sa 36 ka buwan.
Samtang P16,000 ang mahimong ma-loan sa mga SSS members nga bayran sulod sa 24 ka buwan.
Gideklarar sa kagamhanan sa Siyudad sa Lapu-Lapu nga ubos sa state of calamity ang 11 ka barangay sa maong isla base sa rekomendasyon sa City Disaster Risk Reduction and Management Council. Nunot sa pagkanselar og pipila ka adlaw sa mga biyahe paingon sa kabarangayan sa Isla sa Olango gikan sa mainland sa maong dakbayan maoy naapektohan ang ekonomikanhong kahimtang sa mga molupyo sa maong lugar nga nagsugod niadto pang Agosto 4 hangtud sa 9. Ang pagkanselar sa mga biyahe paingon sa maong isla tungod usab sa giluwatan nga gale warning sa Philippine Atmospheric, Geophysical and Astronomical Services Administration (Pagasa) nga nagbase sa dakbayan. (/GMR)(BANATNEWS)